Félagar Guinnessfélagsins eru þeir einir sem uppfyllt hafa skilyrði til inngöngu samkvæmt lögum félagsins.

   Leiðtoginn, GrettirSig

   Fer með æðsta vald í málefnum
   félagsins og er tengiliður þess
   við veröldina utan við kránna.

   Vefstjórinn, Skúli

    Ber ábyrgð á andliti félagsins
    í rafheimum.  Í öðrum efnum ber
    hann einnig einhverja ábyrgð á
    eigin gjörðum, í samræmi við lög
    félagsins.

   Tæknistjórinn  Óli Ylur

   Þó viðurnefnið (já þetta er viðurnefni,
   ekki ættarnafn) hafi Óli fengið sökum
   snilli sinnar við að koma kyndingum í gang
   í fjallakofum, þá þykir mörgum sem 
   nafnið hafi víðari skírskotun. 

    Birgir

    Þrátt fyrir að Birgir sé þekktur
    fyrir að vera dagfarsprúður maður
    og hvers manns hugljúfi, var baráttan
    fyrir inngöngu hans í félagið með
    eindæmum hörð og það svo að stórsá
    á Leiðtoganum.  Birgir hélt sig þó til
    hlés í þeirri baráttu, en það er mat
    manna að hann sé með eindæmum
    vel giftur.

   Einar Kjartans

   Einar krafði inngöngu í félagið
   með flutningi atómljóðs. Ekki skal
   um það dæmt hvort ljóðið hafi orðið
   þeirri kveðskaparhefð til framdráttar
   en inngöngu fékk hann og er dyggur
   félagsmaður og sannur í Guinnessanda.

   Gunni hási

   Gunni nýtur ýmiskonar sérréttinda
   innan félagsins.  T.d. er honum leyfilegt
   að sækja fundi án þess að drekka
   Guinness, en þó með því fororði að
   hann fái sér annan jafndökkan drukk.
   Það gerir Gunna ekki að minni
   Guinnessmanni, enda er hann sá eini
   í félaginu sem hefur heimsótt
   höfuðstöðvarnar í Dublin.

   Hugsuðurinn, Binni

   Binni er sagnfræðingur mikill og
   vel að sér í ólíklegustu hlutum.  Meðal
   frægðarverka má nefna að honum
   tókst að reka hagstofustjóra á gat
   í lögum um lögheimili.  Því er það að
   þrátt fyrir áralanga búsetu í Reykjavík
   á hann lögheimili í Borgarfirði, enda "dvelur
   hann þar í frístundum og á þar bækur".

  HÚtvörðurinn, Helgi

    Helgi Kristjánsson er útvörður
   Guinnessfélagsins í norðri.  Þar
   stendur hann fyrir útibúi félagsins
   með höfuðstöðvar á Húsavík og mun
   það vera nyrðsta starfandi
   Guinnessfélag veraldar, a.m.k. meðal
   dauðlegra manna.



   Óli gróðursæli
   Vinur alls þess sem lifir á jörð er
   Óli gróðursæli.  Meðan aðrir hýrast
   inni í skjóli fyrir haustrigningum, er
   Óli ötull við að undirbúa vini sína í
   plönturíkinu undir harðræði vetrarins.
   Óli telur það þó ekki eftir sér enda
   uppsker hann ævinlega sem hann sáir.

   Sigurjón kafbátaforingi

   Drengur þessi er nýjast meðlimur
   félagsins, en áður en til fullrar aðildar
   kom hafði hann ötullega sótt
   námskynningar og undirbúningsnámskeið.
   Bendir ótvírætt til þess að Sigurjón
   vandi vel til hverra starfa, sem bæði
   inngöngukveðskapur hans ber með
   sér og frammistaða hans á fundum.
  

  Palli á móti

   Palli er einn af þeim fáu sem kemst upp
   með að vera í tveimur sambúðum á sama
   tíma.  Annars vegar býr hann með henni
   Ingibjörgu sinni, þó líklega ekki nema yfir
   blánóttina.  Hins vegar býr hann með
   leiðtoganum í bílskúrnum.  Þar dvelja þessar
   turtildúfur löngum stundum og handlanga
   smurfeiti og gormastífur eða standa í
   öðru föndri með dótið sitt.

   Bessi

   Bessi mun að öllum líkindum vera aldurs-
   forseti félagsins og nýtur ákeðinnar 
   virðingar sem slíkur.  Ekki vegna þess að
   Guinnessfélagar beri almennt svona 
   mikla virðingu fyrir aldri, heldur vegna
   þess að hann hefur aldurs síns vegna
   haft fleiri ár til að drekka Guinness,
   Því hefur hann ákveðið forskot þegar  
   kemur að andlegu atgerfi.